by កំពត ៖ ថ្ងៃមង្គលការមួយដែលគេដឹងថាកូនក្រមុំឈ្មោះ ស ..ភ័ណ្ឌ ជាគូនឹងកូនកំលោះឈ្មោះ ប ..ភាស់ បានធ្វើឱ្យក្រុមភ្លេងនិងភ្នួងស្រឡាំងកាំងបើកភ្នែកធំៗខណៈថ្ងៃចូលរោងស្រាប់តែកូនក្រមុំឆ្លងទន្លេ។ 
តាមព័ត៌មានថាមង្គលការមួយនេះបានរៀបចំឡើងនៅគេហដ្ឋានខាងស្រីតាមទំនៀមទម្លាប់នៅភូមិស្វាយផ្អែមឃុំបឹងសាលាខាងត្បូងស្រុកកំពង់ត្រាចខេត្តកំពត។
ប៉ុន្តែអ្វីដែលមិននឹកស្មានដល់នោះនៅវេលាម៉ោងជិត៦ទាបភ្លឺ ខែមីនាដែលជាថ្ងៃចូលរោងស្រាប់តែកូនក្រមុំឈ្មោះ ភ័ណ្ឌ បានឈឺពោះឆ្លងទន្លេបង្កើតបានកូនស្រីមួយនៅមន្ទីរពេទ្យបង្អែកស្រុកកំពង់ត្រាចប្រកបដោយសុវត្ថិភាពដោយទុកឱ្យកូនកំលោះឈរជាសាម៉ីខ្លួនបន្តពិធីជាពិសេសគឺឈរទទួលភ្ញៀវតែម្នាក់ឯង ឯកូនក្រមុំនៅឯមន្ទីរពេទ្យ ។ 
បើយោងតាមការឱ្យដឹងពីលោកអាចារ្យអ្នកកាន់កម្មវីធីមង្គលការនិយាយថាថ្ងៃចូលរោងមិនមានកូនកំលោះកូនក្រមុំទេគឺបានត្រឹមតែយកសម្លៀកបំពាក់កូនកំលោះនិងកូនក្រមុំ មកដាក់រៀបចំសែនព្រេនជូនដូនតាសាច់ញាតិកូនប្រុសកូនស្រីប៉ុណ្ណោះ ។
អ្នកដែលដឹងរឿងបានបន្ទោសដល់អ្នកអាណាព្យាបាលខាងស្រីថា បើកូនមានផ្ទៃពោះគ្រប់ខែហែតុអ្វីក៏រៀបការគួរតែចាំឆ្លងទន្លេហើយចាំការក៏វាមិនហួសពេលអ្វីដែរ ។ បើតាមការឱ្យដឹងពីក្រុមសាច់ញាតិកូនក្រមុំថានាង សន សុភ័ណ្ឌ 
ទៅលក់អីវ៉ាន់នៅកំពង់សោម ឯឈ្មោះ បៀច ភាស់ កូនកំលោះជាអ្នករត់តាក់ស៊ីពីកំពង់ត្រាចទៅខេត្តព្រះសីហនុព្រោះកូនកំលោះមានស្រុកកំណើតនៅឃុំដំណាក់កន្ទួតខាងជើងស្រុកកំពង់ត្រាចខេត្តកំពតបានទាក់ទងស្គាល់គ្នានឹងបានបង្កើតចំណងស្នេហា៕
